Navigation
Revista Filipina
Segunda Etapa. Revista semestral de lengua y literatura hispanofilipina.
Invierno 2019, volumen 6, n
úmero 2

BIBLIOTECA Y ACTUALIDAD
OTOÑO EN ZAMBOANGA
Tres poemas en chabacano

ARNOLYN EUGENIO BALATON
Escuela Regional de Ciencias. Zamboanga



Melodia del Otoño

El frialdad ya barre fuerte,
Maga flores ya seca,
Y tu presencia perdido ya.
Tu mano, tu ojos,
Y aquel calor;
Maga memorias
necesita olvida.
El dolor
necesita desaire.

Con el maga dia cuando
maga flores bien floriao,
Y el calor del sol bien dominao.
Con el maga noche cuando
maga camino blanco,
un tasa de cafe na mi mano.
Talla tu y yo,
Amando na uno y otro.

Despues, el dos ya queda uno, el kita ya deja conmigo solo.
El tonto que ta endura agarra,
Y ta recorda el tres tiempo aquel tu.
Tu que ya sale junto con el maga estrella na cielo
Que ahora ya queda ya azul.
Ta endura agarra con el necesita larga,
sino que el deseo hende ta para.
Ta recorda con el necesita olvida,
sino que el amor hende ta finaliza.

Tu y yo hende saciao oi con el maga cancion de amor,
Kita dos hende pa tanto cansao.
Pero el flores que tu agarrao ya queda delicao,
Y el todo kita tiene ahora ya sale desalejao



El Cosa Ya Perde

Yo antes sabe dibuja,
antes quiere-quiere baila.
Alegre y confidente como un bata,
pero ahora, hende ya.

El cosa ya perde
cuando yo ta queda grande?
El maga aficion que yo tiene,
maga cosas que quiere yo hace,
un pedazo del mi vida que
yo necesita ole.
El cosa ya perde
cuando yo ta queda grande?
Este el mi confidencia que
yo ya tiene.

Ya sabe yo toca instrumento
por cuatro año,
pero ahora no sabe toca ni un pedazo.
Yo ta envidia con el otro,
sila bien bueno toca piano.
Por de antes, de aquel tambien yo.
Tiene vez, ta llega na mi pensamiento
que yo no hay lang gayod talento.
Pero este ba gayod el caso?

Yo antes quiere-quiere dibuja,
sabe yo que yo un artistico bata.
Yo antes quiere-quiere tambien baila,
masquin manada gente que mira,
Pero ahora, yo un dalaga ya,
el huya conmigo ta saca.

Si, sabe yo hinde pa este el ultimo,
puede yo descubri ole mi maga talento
que ya perde junto con el viento.
Un dia, un tiempo.



El Lloro del Jovenes

Alas cuatro del aga, yo ta despierta.
Masquin no hay pa sona mi alarma
O entra na cuarto si Mama.
Ahora alas cuatro del aga
El cielo oscuro lang siempre y
El subida del sol no hay pa ocuri.
No hay pa quien otro despierto,
Yo lang y mi mismo cuerpo.

Mi examen pasa acaba d’este semana,
Y el actuacion por grupo ay ocuri mañana.
El filmada del de amon video ya acaba ya,
Pero el presentacion del mi discurso no hay pa.

Este sistema ta hace acaba mi vida,
Mi cansancia hende ta acaba.
No hay gayod el maga estudiante descancia.
El de amon maga fin de samana
Hende tanto otro na
Maga dia na escuela.
Maga estudiante bien cansao ya,
El otro no sabe cuando ya despierta
Acaba el ocho hora del dormida.

El maga huyap ta oi na clase por cuantos veces,
El otro ta dormi masquin no hay pa come.
Maga estudiante, si tu mira na clase,
Dol ta oi na maestra pero tu no cre,
Kame ta man viendo lang ta mira na aire.
El cansancia ya llega ya,
Pero hende pa kame ta descansa.

Con todo el expectacion que kame tiene
por el de amon maga mismo cuerpo que
estaba con el expectacion del de amon maga pariente,
el descansa hinde ta puede hace.
Este el cosa makatriste
Y el mas triste con este?
Kame no sabe cuando puede
Descansa, goza, y re otra vez.